hönnun & hlutir: Jens Risom - Hönnuðurinn sem lifir endurkomu sína

Það fer ekki á milli mála á hvaða tímabili þessi húsgögn eru hönnuð

Nýlega var hafin á ný framleiðsla á húsgögnum sem Jens Risom hannaði á árunum 1950-1970.

Jens Risom hefur starfað við hönnun og húsgagnaframleiðslu í meira en 70 ár og er enn að, komin á tíræðisaldur, fæddur í Danmörku 8. maí 1916.

Risom nam húsgagnahönnun við listiðnaðarskólann í Kaupmannahöfn 1935-1938. Nöfn Börge Mogesen og Hans Wegner eru jafnan tengd þessum árgangi en minna sagt frá öðrum nemendum. Eigi að síður voru þarna margir afburða hönnuðir m.a. Íslendingarnir Helgi Hallgrímsson og Skarphéðinn Jóhannsson.

Jens Risom í garðinum heima

Risom flutti til Bandaríkjanna 23 ára gamall og hefur búið þar síðan. Árið 1942 hannaði hann fyrstu húsgögnin sem Hans Knoll, sem nú er eitt virtasta húsgagnafyrirtæki heims, setti á markað. Þar var m.a.stólinn "654 W", gerður úr birki og böndum sem til féllu við fallhlífasaum stríðsáranna. Hann kostaði $21- og er ennþá framleiddur hjá Knoll en einhver núll hafa bæst aftan á verðið.

Þegar samstarfinu við Knoll lauk 1946 stofnaði Risom húsgagnaverksmiðju. Þörfin fyrir vönduð og vel hönnuð húsgögn var mikil og innan tíðar voru útibú í helstu borgum Bandaríkjanna, Englandi, Ástralíu og víðar. Kjörorðin voru "The Answer is Risom" og af vörulistum má sjá að afköst Risoms voru mikil ( hér eru 1948 og 1949).

Þrátt fyrir mikilvægt framlag til hönnunar og framleiðslu húsgagna hefur verið fremur hljótt um Risom í hönnunarsögunni. Á síðari árum hefur þó orðið breyting þar á og honum hlotnast margvíslegar viðurkenningar. Betra seint er aldrei. Hann stendur nú á þeim merku tímamótum að verða vitni að endurkomu sinni, ef svo má segja. Að eigin sögn er þessi áhugi á honum þó aðallega til komin vegna þess að hann er eini eftirlifandi þeirra hönnuða sem sátu fyrir á mynd sem birtist í Playboy (sjá hér)!