Vagg og velta fyrir börnin

Ruggubíll frá 1950 eftir Hans Brockhage (1925-2009). Hjól á einni hlið,vagg og velta á hinni.

Allir njóta þess að setjast í eitthvað sem vaggar og veltur, sérstaklega börn. Til að uppfylla þessa þörf hafa hönnuðir fundið upp á ótrúlegustu hluti. 

Hér eru nokkur dæmi sem þarfnast ekki skýringa - myndirnar segja meira en orð.

Myndirnar koma víða að, upplýsingarnar um þær eru frá vinstri til hægri.

Ruggubúkki (hestur) - Remodelista

Rockid - Ontwerpduo

Eames ruggustóll - Vitra

Rugguhestur ú endurnýttu efni - StillNovoDesign

La Clinica róla - Ciszak Dalmas

Rugguönd - Florian Hauswirth

 Mokuba rugguhestur - O & M Design

Rugguvespa - Etzy

Rugguhestur - Marc Newson

Ruggustóll/vagga - Scott Morrison

Hér er svo eitthvað fyrir þá sem ekki sætta sig við rugguhest: Ruggukind í mörgum litum.

Útskurðarmeistarinn Povl Kjær smíðar gripinn, sem fæst m.a. í Schiang Living.

Tools at Schools - Nemendur í 8. bekk hanna skólahúsgögn

Á meðan nemendur í 7. bekk Valhúsaskóla unnu "Stólafjör" og flikkuðu upp á gamla stóla úr tilfallandi efni unnu 44 nemendur í 8. bekk grunnskóla, sem starfræktur er við Kolumbíuháskóla, að svipuðu verkefni. Þar var fjárhagur og aðstaða rýmri og því hægt að ganga enn lengra í fræðslunni. 

Glæsileg skólahúsgögn hönnuð af unglingum fyrir unglinga

Verkefnið Tools at Schools" var unnið í samvinnu við tvö heimsþekkt fyrirtæki, hönnunarstofuna Aruliden og húsgagnaframleiðandann Bernhardt Design. Það stóð í 25 vikur og skilaði undraverðum árangri. Aðstandendur verkefnisins fullyrða að allir skólar geti náð sama árangri með vönduðum undirbúningi.

Fataskápar með segulspjaldi og póstlúgu á hurðinni - Viður og mildir litir gera húsgögnin hlýlegri

Verkefnið sem lagt var fyrir nemendurna fólst í því að skoða og meta aðstæður og hluti sem þau umgengust í skólanum sínum og hanna svo kennslustofu framtíðarinnar eins og þau sjá hana. Ekkert smá verkefni.

Hirslan í borðplötunni rúmar ýmislegt t.d. blóm og bækur.
Sæti stólsins er fjaðrandi og á grindinni er hægt að geyma ýmislegt.

Verkefnið var sett upp í alvöru hönnunarferli, þarfagreining, rannsóknir, frumgerðir í skissum, 3vídd og módelsmíði. Hönnuðirnir leiðbeindu nemendunum og miðluðu upplýsingum og fróðleik um allt hvaðeina sem hönnun snertir. Framleiðandinn tók svo við og smíðaði hlutina sem börnin hönnuðu. Niðurstaðan er þessi glæsilegu húsgögn sem nú hafa verið sýnd á söfnum og sýningum og vakið mikla athygli á verkefninu. 

Stoltir hönnuðir við nýju skólahúsgögnin sín

Hér er hægt að skoða nokkur áhugaverð myndbönd um verkefnið

.

Gamlir stólar og Skólahús í Grenivík

Gamlir skólastólar í smíðastofu Grenivíkurskóla
1. Í smíðastofunni - 2 og 4. Með vel þekktum félaga - 3. Stóllinn staflast mjög vel

Í Grenivíkurskóla komum við auga á þessa gömlu skólastóla í sumar. Þeim var snyrtilega staflað upp við vegg í smíðastofunni og það fór ekki á milli mála að þeir eru enn í notkun, þrátt fyrir háan aldur. Svona stóll hefði frá mörgu að segja, gleði, sorgum, sögum og söng, gæti hann talað - hver veit nema einhver hafi hæfileika til að ná sambandi. En þeir segja einnig hverjum sem vita vill ýmislegt áhugavert. Ef þeir hafa verið fyrstu stólar í "Gamla skólanum", sem er nokkuð líklegt, eru þeir 86 ára gamlir. Vera má að eitthvað hafi verið lappað upp á þá meira en með málningu en samsetningar, rör og tréverk eru í góðu ásigkomulagi. 

Um tíma mátti víða sjá svona stóla á flækingi en það er óvanalegt að sjá þá enn í notkun.

Gamlir en standa fyrir sínu þó ekki séu þeir samkvæmt stöðlum, enda enginn fullkomin skólastóll til.

Þetta eru einfaldir en sterkir stólar, hæfilega þungir og þeir staflast vel. Sé litið á hlutföll sést að þeir henta ekki vel til setu við borð, til þess er of mikill halli á setu og baki, sethæð passar fullvöxnum (kannske voru fleiri stærðir) og hátt bakið veitir lítinn stuðning. Þetta eru hin dæmigerðu vandamál skólastóla allra tíma - einnig í dag. Til gamans er hér teikning sem sýnir tvær algengar stærðir nútíma skólastóla - Rautt= stór, blátt= miðlungs.  Hér má sjá annan gamlan skólastól með forvitnileg hlutföll.

Gamli skólinn í´Grenivík  eftir Rögnvald Ólafsson 1925

Gamla skólahúsið í Grenivík var tekið í notkun árið 1925. Það var teiknað af Rögnvaldi Ólafssyni (1884-1917) arkitekt. Í því voru tvær kennslustofur og samkomusalur með senu. Í þessu húsi var skólahald og samkomuhús Grýtubakkahrepps til 1981, nú er skrifstofa Grýtubakkahrepps þar til húsa. 

Rögnvaldur var fyrsti Íslendingurinn sem nam byggingarlist og fyrsti nútíma húsameistarinn sem Íslendingar eignuðust. Meðal bygginga sem hann hannaði eru Pósthúsið í Reykjavík, Húsavíkurkirkja og Vífilsstaðahælið, ein mesta bygging landsins á þeim tíma, þar lést Rögnvaldur aðeins 43. að aldri árið 1917. 

Hér er góð grein um Rögnvald Ólafsson eftir Gísla Sigurðsson í Morgunblaðinu 1973.

.

.

Stólafjör - Börnin í Valhúsaskóla hressa upp á umhverfið

Börnin í 7. bekk Valhúsaskóla unnu skemmtilegt og fræðandi verkefni í fyrra. Eftir margra ára notkun voru stólarnir í mötuneytinu orðnir snjáðir, illa farnir og langt frá því að vera augnayndi. Upp kom sú hugmynd að nemendurnir gætu sjálfir lappað upp á þá.  Móa og Ásta, kennarar í myndmennt og textíl, fræddu börnin um  endurnýtingu, sýndu þeim listaverk, nytjahluti og annað sem tengja mátti verkefninu. Í hópvinnu skiptust börnin á hugmyndum, ákváðu þema og hófu framkvæmdir. Efniviður kom úr safnveitu skólans en í hana fara endurnýtanlegir hlutir sem til falla - taubútar, plastdósir, pappír, bönd o.fl. frá allri starfsemi skólans m.a. skrifstofu og mötuneyti. Árangurinn er glæsilegur - 15 flottir stólar, hver með sitt nafn,  sem geta hresst upp á mötuneytið svo um munar. 
Mikilvægast er þó að hér tóku börnin þátt í að móta umhverfi sitt, fræðast um ýmislegt sem máli skiptir við mótun þess og þau gripu til aðgerða - og tókst frábærlega til. Enginn er of ungur eða gamall til að taka virkan þátt í að móta umhverfi sitt. Til marks um það má benda á smíðavelli barnanna sem hressa upp á umhverfi okkar á sumrin - stórkostleg og óheft byggingarlist -  öllum til gleði, ungum sem öldnum.

Á menningarhátíð Seltjarnarness 2011 var sett upp sýning á stólunum -"Stólafjör" - í Bókasafni Seltjarnarness og vöktu þeir mikla lukku. 

Kærar þakkir til Ástu og Móu fyrir myndirnar. Hönnun & hlutir ber ábyrgð á skuggunum skrítnu sem fylgja stólunum;-)

Heimur barnsins - stóll eða leikfang?

Leikföng sem geta verið húsgögn.

• 75 - 230 dollara leikföng frá Magis •

Eames Fíll

Börn nota flesta hluti öðruvísi en fullorðnir. Stólar gegna t.d. fleiri hlutverkum en að sitja á þeim, stólar á hvolfi, stólar sem búðarborð eða skip, möguleikarnir eru óteljandi. Hvað er stóll sem er búðarborð, er hann stóll, búðarborð eða hvort tveggja? Getur verið að hann sé "leikfang" sem fer bara í það hlutverk sem leikandinn finnur í hvert skipti?
Önnur gerð húsmuna fyrir börn er smækkuð útgáfa frægra hluta. Þessir hlutir ganga út frá því að heimur barnsins, sé smækkuð mynd af heimi fullorðinna. Getur verið að hamingja barns felist í litlum Barcelona stól, eftir Mies van der Rohe fyrir 5.655 dollara? Er hann gott búðarborð?

Myndasyrpurnar sýna; leikföng sem geta verið sæti og stóla sem geta verið....stólar? Leikföngin á efri myndinni kosta 75 - 230 dollara,  stólarnir á neðri myndinni 554 - 5.655 dollara. Svo er bara að ákveða af hvoru barnið hefur meira gaman og , ekki gleyma þessu, hvort er meira þroskandi. Hvað mig varðar, er valið auðvelt!

Húsgögn sem geta verið .....

• 554 - 5.655 dollara húsgögn frá Knoll, Kartell og Vitra •

Það er sanngjarnt að bæta við þessu;  það skiptir auðvitað máli hvernig hlutirnir eru þegar þeir eru ekki í notkun. Ákjósanlegt er að þeir séu augnayndi og geti bara staðið þar sem þeir voru skildir eftir þar til þeir bregða sér í nýtt hlutverk. Hér eru þannig hlutir Falleg leikföng frá Sirch

Þá er einnig rétt að taka fram að verðin eru gefin í dollurum vegna ástands krónunnar. Úr því verður bætt um leið og henni er batnað.

Ævintýraleg barnahúsgögn • iPod lurkur og fröken Herðatré

Í 25 ár hefur Judson Beaumont hannað og smíðað húsgögn í fyrirtæki sínu Straight Line Designs. Nafnið er reyndar á skjön við framleiðsluna því hún er allt annað en beinar línur. Þeir sem hafa komið til Undralands (með Lísu), eða búið í teiknimynd, munu kannast við barnahúsgögnin hans. Við hin verðum að nota ímyndunaraflið.

• Húsgögnin hafa skemmtileg nöfn t.d. Oops • Frú Peaerson • Boom og Sullivan •

• Teikningar, vangaveltur og útkoman er eins og tveir turnar •

• Little Black Dresser  hangir á hlýrunum •

Straight Line Designs er í Vancouver í Canada. Auk húsgagnanna eru smíðaðar innréttingar, leikmunir og allskonar sérsmíði. Judson Beaumont hefur einnig unun af að  hanna leiksvæði fyrir barnaspítala.  Sköpunarkrafturinn fer ekki fram hjá neinum og húmorinn í verkunum er bráðskemmtilegur. Hann gaf nýlega út bók með verkum sínum. Mottó   hans er "Spurningin er ekki hvað við höfum gert, heldur hvað við gerum næst."

Skoðið líka bráðskemmtilegar skissur hans og blog.

Þetta hengi, skúffa, herðatré eða hvaða nafn sem við finnum því er u.þ.b. 25sm á dýpt

 • iLog • Það væsir ekki um iPodinn í þessum lurk •

Falleg leikföng og sleðar frá Sirch

Frá 1805 hefur Sirch í Þýskalandi smíðað sleða og nú hafa leikföng og húsgögn bæst við. Hlutirnir eru aðallega smíðaðir úr ask og birki krossviði sem er beygður í gufu. 

• Leikföng • Framleiðandi: Sirch

Leikföngin fá Sirch eru ætluð eru börnum frá 12 mánaða aldri, þau eru öryggisvottuð og mjög vönduð, t.d. eru hjólin stór, mjúk og hljóðlát og öll horn eru ávöl. Þau eru algjörlega tímalaus, munu örugglega gleðja börn í margar kynslóðir og svo falleg að það þarf ekki að taka til, þau geta bara staðið þar sem þau eru skilin eftir og glatt augað. Hér má hlaða niður leikfanga- og húsgagnabæklingi (1.2Mb)

• Sleðar • Framleiðandi: Sirch

Þeir ættu að kunna að smíða sleða hjá Sirch, staðsettir við rætur Alpafjalla og með 205 ára reynslu, því þeir hafa smíðað sleða frá stofnun fyrirtækisins árið 1805.

Suma sleðana er hægt að leggja saman svo auðveldara sé að halda á þeim; brekkur liggja ekki bara niður á við! Sleðarnir eru smíðaðir úr aski eða akasíu tré og það fást fleiri gerðir en hér eru sýndar. Hér má hlaða niður sleðabæklingi (2.5Mb)

Barnaskólar um víða veröld

Hér má sjá börn í skólum við ýmsar aðstæður. Myndirnar eru víða að; Indland, 

Kambódia, Rússland, Bretland, USA og víðar.

Menntun er ekki allsstaðar sjálfsögð og aðstæður eru æði misjafnar, eins og sjá má.

Ef textinn er truflandi þá er til einföld lausn:

Bara skoða tvisvar og einbeita sér að myndum og tónlist í seinna skiptið!