Tætingslegt bárujárnshús í Ástralíu.

Undanfarið hefur mikið borið á húsgögnum og innréttingum úr endurnýttu timbri, helst illa förnu og hrörlegu (sjá dæmi). Þessi tíska er svo vinsæl að nú er farið að framleiða "gamalt timbur" til þessa brúks - svona rétt eins og splunkunýjar gauðrifnar gallabuxur. Það var því bara tímaspursmál hvenær þessi stíll færði sig út fyrir húsvegginn og settist að utan á húsunum.

Þetta hús í Ástralíu er gert úr gömlu skúrhræi sem var rifið og endurbyggt en

klætt götumegin með sama ryðgaða og tætingslega bárujárninu. Að öðru leyti er allt burðarvirkið nýtt, gluggar úr Corten stáli og bakhlið úr hvítum plötum, og ekki bera innviðir hússins keim af tætingslegri ytri ásýnd þess. Hönnuður hússins er Raffaello Rosselli og myndirnar eru frá designboom.

Óhjákvæmilega veltir maður fyrir sér hvernig svona byggingu yrði tekið á Íslandi þar sem bárujárnshús eru þjóðleg byggingarhefð og mikið lagt í að gera þau snyrtileg. Fátt yljar manni eins um hjartarætur og fallega uppgert bárujárnshús. 

En svo er fegurðarskyn fólks auðvitað misjafnt - mér þykir til dæmis hugmyndin um  ryðgað Corten stál á væntanlegu fangelsi á Hólmsheiði hvorki falleg né mannvæn en arkitektarnir eru á annarri skoðun.

Bakhliðin er úr hvítmáluðum sementsplötum.

Gluggar úr Corten stáli - annað er bárujárn.

Skúrinn fyrir og eftir endurbyggingu.

Blikklædd útihurð en að innan er húsið ósköp venjulegt - hvítmálaðir veggir og krossviður.

Væntanlegt ryðgað fangelsi á Hólmsheiði.  Fallegt og mannvænt?
(Mynd úr umsögn dómnefndar)

Maggie´s endurhæfingastöðvarnar

Maggie's Cancer Caring Centres eru endurhæfingar- og stuðningsmiðstöðvar fyrir þá sem hafa fengið krabbamein og aðstandendur þeirra. Stöðvarnar eiga upphaf sitt að rekja til hönnuðarins og landslagsarkitektsins Maggie Keswick Jencks, sem gekkst sjálf undir krabbameinsmeðferð og fann hve erfitt er að afla upplýsinga um sjúkdóminn og andlegs stuðnings, sem er mikilvægt fyrir fólk í sem greinst hefur með krabbamein. 

Sýn hennar var að koma upp byggingum á nágrenni sjúkrahúsa þar sem leita mætti upplýsinga og stuðnings hjá fagfólki. Athvarfs þar sem hver sem er getur komið hvenær sem er til að deila með öðrum og skapa sér aðstæður til að lifa lífinu til fulls í vinalegu umhverfi sem ekki minnir á sjúkrastofnun.

Maggí vann hörðum höndum að skipulagningu fyrsta stöðvarinnar sem opnaði í Edinborg árið 1996 - einu ári eftil andlát hennar. Stöðin er staðsett í endurbyggðu hesthúsi og hlöðu frá Viktoríutímabilinu. Hún er hönnuð af vini Maggíar, arkitektinum Richard Murphy, sem hannaði einnig stækkun við hana sem var opnuð 2001.
Sem hönnuður þekkti Maggí hver áhrif umhverfi getur haft á fólk og lagði mikla áherslu á að gott umhverfi væri bæði heilandi og sjálfsögð mannréttindi og hún fékk til liðs við sig færa arkitekta til að tryggja að Maggie´s stöðvarnar þjónuðu þessum þörfum.

Eiginmaður Maggíar, Charles Jencks arkitekt og rithöfundur, hefur síðan haldið uppi merki hennar og fengið heimsfræga arkitekta til liðs við Maggie's stofnunina til að hanna stöðvar á Bretlandi og víðar svo brátt verða þær orðnar 23, allt frá Skotlandi til Hong Kong, og fleirri eru í undirbúningi. Auk þess hafa ýmiss önnur samtök komið á upp stöðvum víða um heim sem starfa í anda Maggie´s .

Um starfsemi Maggie´s Cancer Caring Centre mætti skrifa langa grein en hér er aðalega fjallað um byggingarnar. Á heimasíðu Maggie´s má nálgast meiri upplýsingar um starfsemi stöðvanna og þar er einnig hægt að sækja "A View From the Front Line" frásögn af baráttu Maggíar. Á vef The Guardian er mjög fróðleg grein sem segir í stuttu máli frá baráttukonunni Maggí, samtökunum og byggingarlistinni.
Sennilega hefur hvergi verið safnað saman jafn mörgum stjörnu-arkitektum til að vinna fyrir einn og sama aðilan. Til dæmis er Maggie´s Centre í Fife í Skotlandi fyrsta bygging sem reist er eftir Zaha Hadid á Bretlandi þrátt fyrir að teiknistofa hennar hafi starfað í London í mörg ár og Hadid fyrir löngu öðlast heimsfrægð fyrir verk sín. Í Dundee teiknaði Frank Gehry stöð sem opnaði 2003 og nú er hann að teikna aðra stöð í Hong Kong, í Aberdeen er norska teinistofan Snøhetta að teikna stöð og stöðina í Glasgow hannaði Rem Koolhaas (OMA).  Allt heimsfrægar teiknistofur enda hafa byggingar Maggie´s hlotið fjölda verðlauna fyrir hönnun.  Framhald............

Morgunferð í Leifsstöð

Regnboginn eftir Rúrí 

Aksturinn í Lefsstöð er orðinn flestum svo tamur að leiðina má næstum aka með lokuð augu. Oft er fólk snemma á ferð - var að pakka í ferðatöskur langt fram eftir nóttu -svo það er um annað að hugsa en umhverfið og á stundum nóg með að halda sér vakandi. 

En ef vel er að gáð er margt áhugavert að sjá á þessari leið. Sé maður að aka einhverjum í Leifsstöð, er því upplagt að gefa sér tíma til að skoða umhverfið og fara e.t.v. Vatnsleysuströnd til baka.

Hér eru nokkur mannvirki sem á vegi manns verða en auðvitað er það landið sjálft sem mest heillar.

Regnboginn eftir Rúrí er afar fallegur og margbreytilegur þar sem hann rís úr jörðu og skiptir stöðugt um liti og ásýnd eftir veðri og dagtíma

Við Leifsstöð - ekki eru allir á eitt sáttir um ágæti rauða hússins

Það er snyrtilegt við Leifsstöð. Húsið sjálft stendur vel og þjónustubyggingar eru lágreistar - nema rauða byggingin sem er eitt af fyrstu kynnum útlendinga af íslenskum arkitektúr og sitt sýnist hverjum um þá kynningu.

Litríkit hutaveitutankar og dælustöð

Ormar Guðmundsson arkitekt hannaði vatnstankana sem eitt sinn voru umdeildir vegna litadýrðar. Í dag sóma þeir sér vel með öðrum byggingum á svæðinu og allir eru sáttir við þá. Ormar hannaði einnig orkuverið í Svartsengi sem sést til á leiðinni

Mannvirki innan girðingar

Inni á flugvallarsvæðinu eru ýmis mannvirki sem maður veitir sjaldan eftirtekt. Þessi tvö eru t.d. athyglisverð, jafnvel þó ekki væri nema vegna þess hvernig birtan leikur um þau.

Þotuhreiður

Þotuhreiður Magnúsar Tómassonar í allri sinni stærð er ótrúlega fínlegt og konseptið skemmtilegt. Skugginn færist til eftir gangi sólar eins og á plánetu.

Bjart glerhús við brottfararstigan

Upphaflega var Leifsstöð afar drungaleg að innan en síðari tíma viðbætur hafa bætt úr því. Glervirkið við brottfararstigan gerir mikið fyrir húsið og þaðan sést í Þotuhreiðrið í návígi og Regnbogann fjær. Grindin í glerhúsinu er líka fín.

Strætóskýli Reykjanesbæjar

Í Reykjanesbæ má sjá enn eina eftirhermu af  rauðu skýlunum í Reykjavík, sem Birna Björnsdóttir innanhússarkitekt og Gunnar Torfason verkfræðingur  hlutu verðlaun fyrir árið 1980. 

Fáir hlutir hafa þurft að þola jafn margar lélegar eftirlíkingar og þessi skýli, sem voru mjög fín og gætu verið Reykjavíkurborg til sóma ef upprunalegu hönnuninni hefði verið fylgt. Í stað þess hafa einhverjir gert ótrúlegar skrumskælingar af þeim um allt land, samanber skýlin í Reykjanesbæ.

Sannkölluð sumarhöll við Vatnsleysuströnd

Við Vatnsleysuströnd stendur þetta sérstaka hús sem ég hef ekki meiri upplýsingar um í bili. Bæti úr því seinna.

Gamlir stólar og Skólahús í Grenivík

Gamlir skólastólar í smíðastofu Grenivíkurskóla
1. Í smíðastofunni - 2 og 4. Með vel þekktum félaga - 3. Stóllinn staflast mjög vel

Í Grenivíkurskóla komum við auga á þessa gömlu skólastóla í sumar. Þeim var snyrtilega staflað upp við vegg í smíðastofunni og það fór ekki á milli mála að þeir eru enn í notkun, þrátt fyrir háan aldur. Svona stóll hefði frá mörgu að segja, gleði, sorgum, sögum og söng, gæti hann talað - hver veit nema einhver hafi hæfileika til að ná sambandi. En þeir segja einnig hverjum sem vita vill ýmislegt áhugavert. Ef þeir hafa verið fyrstu stólar í "Gamla skólanum", sem er nokkuð líklegt, eru þeir 86 ára gamlir. Vera má að eitthvað hafi verið lappað upp á þá meira en með málningu en samsetningar, rör og tréverk eru í góðu ásigkomulagi. 

Um tíma mátti víða sjá svona stóla á flækingi en það er óvanalegt að sjá þá enn í notkun.

Gamlir en standa fyrir sínu þó ekki séu þeir samkvæmt stöðlum, enda enginn fullkomin skólastóll til.

Þetta eru einfaldir en sterkir stólar, hæfilega þungir og þeir staflast vel. Sé litið á hlutföll sést að þeir henta ekki vel til setu við borð, til þess er of mikill halli á setu og baki, sethæð passar fullvöxnum (kannske voru fleiri stærðir) og hátt bakið veitir lítinn stuðning. Þetta eru hin dæmigerðu vandamál skólastóla allra tíma - einnig í dag. Til gamans er hér teikning sem sýnir tvær algengar stærðir nútíma skólastóla - Rautt= stór, blátt= miðlungs.  Hér má sjá annan gamlan skólastól með forvitnileg hlutföll.

Gamli skólinn í´Grenivík  eftir Rögnvald Ólafsson 1925

Gamla skólahúsið í Grenivík var tekið í notkun árið 1925. Það var teiknað af Rögnvaldi Ólafssyni (1884-1917) arkitekt. Í því voru tvær kennslustofur og samkomusalur með senu. Í þessu húsi var skólahald og samkomuhús Grýtubakkahrepps til 1981, nú er skrifstofa Grýtubakkahrepps þar til húsa. 

Rögnvaldur var fyrsti Íslendingurinn sem nam byggingarlist og fyrsti nútíma húsameistarinn sem Íslendingar eignuðust. Meðal bygginga sem hann hannaði eru Pósthúsið í Reykjavík, Húsavíkurkirkja og Vífilsstaðahælið, ein mesta bygging landsins á þeim tíma, þar lést Rögnvaldur aðeins 43. að aldri árið 1917. 

Hér er góð grein um Rögnvald Ólafsson eftir Gísla Sigurðsson í Morgunblaðinu 1973.

.

.

Berg - Menningarhús í Dalvík

Menningarhúsið Berg í Dalvík

Fögur fjallasýn - efnisval og form mynda fína samsvörun við umhverfið

Fjölskylduhátíðin Fiskidagurinn mikli er haldinn hátíðleg í Dalvíkurbyggð í dag, fyrsta laugardag eftir Verslunarmannahelgi.  Búist er við meira en 30.000 gestum á hátíðina í ár. Þar verða því margir á ferð enda margt að skoða.
Um helgina eru líka tvö ár frá því að Sparisjóður Svarfdælinga afhenti bæjarbúum menningarhúsið "Berg" til afnota, þann 5. ágúst 2009. Í húsinu er aðstaða fyrir menningarstarfsemi af öllu tagi , Bókasafn Dalvíkur, upplýsingamiðstöð, 180 manna fjölnota salur sérhannaður fyrir tónlistarflutning, kaffistofa og aðstaða fyrir sýningar. 

Þetta er flott hús, efnisval og formgjöf frumleg og í góðu samræmi við staðsetninguna. Úr kaffistofunni má njóta útsýnis yfir Eyjafjörð og af pallinum, sunnanvert við húsið, sést til fjalla - þar er líka áhorfendabrekka ef einhver vill performera á pallinum. Flæðandi formið sem myndar kaffistofu og forrými að sal og bókasafni mun vera byggt á smáranum, merki sparisjóðanna. Þeir sem eiga leið um Dalvík ættu að líta við í Bergi, þar líður manni vel.

Fanney Hauksdóttir arkitekt hjá AVH á Akureyri hannaði húsið og á heiður skilinn fyrir. Þeir sem vilja leita húsa hennar á Akureyri og víðar ættu að líta eftir húsum með turni, þeir eru í miklu uppáhaldi hjá Fanneyju. Skemmtilegt.

Flæðandi formið er byggt á smáranum, merki sparisjóðanna

Salur og kaffistofa - skemmtilegar andstæður

Á kaffistofunni - Eyjafjörður og  stóllinn "Skata" eftir Halldór Hjálmarsson

Harpa tónlistarhús frá hafi

Vinstra megin er ljósmynd, hægra megin er tölvugerð mynd

Það styttist óðum í að tónlistarhúsið Harpa opni. "Húsið þitt" og "Ný framtíðarsýn" segir á vef Hörpu. Húsið hannaði teiknistofa Henning Larsens i samstarfi við Batteríið arkitekta. Ólafur Elíasson hannaði glerhjúpinn sem umlykur húsið í samvinnu við arkitekta teiknistofunnar. Eitt af megineinkennum hans er tilvísun í ýmis fyrirbæri úr náttúrunni og einstök birtuskilyrði landsins. Sagt er að hjúpurinn verði einstaklega áhrifamikill sjávarmegin við húsið. Tölvugerða myndin hér að ofan, gerð af arkitektunum, sýnir húsið frá þessu sjónarhorni. Það er alltaf spennandi að sjá hve rétta mynd af byggingum tölvumyndir gefa, alltaf er hætta á að eitthvað fari úrskeiðis og útkoman verði önnur en myndin sýnir. Ég tók því nokkrar myndir til að kanna hve raunhæf tölvumyndin er. Vinstra megin er ljósmynd tekin á rigningardegi, hægra megin er svo tölvugerða myndin og það verður að segjast að útkoman er ótrúlega nákvæm. Veðrið hefur reyndar verið skárra daginn sem tölvumyndin var gerð en þá ber líka að hafa í huga að ekki er búið að "kveikja" á húsinu þegar ljósmyndin var tekin, það mun væntanlega breytast mikið þegar ljósin inni verða tendruð. Að neðan er svo mynd af húsinu, höfninni og Reykjavík af hafi, það er hægt að skoða hana stærri hér. 

Reykjavík, Harpa og höfnin af hafi.
.
Hér er önnur samskonar pæling
.
.

Hönnun ala Kópavogur

Þetta biðskýli vakti athygli mína er ég átti leið um Kópavog í gær. Alla jafna eru biðskýli með glugga a.m.k. í þá áttina sem búast má við að strætó komi úr. En þetta skýli er vandlega lokað og það er meira að segja nostursamlega málað yfir spjöldin þar sem ég reikna með að einu sinni hafi verið gluggar. Hvernig fylgist maður með strætó í slíku skýli - með því að bíða fyrir utan? Nei, maður kíkir bara út um kýraugað, það er reyndar í 160 sm hæð - en hvað - börnin bíða bara úti ef þau eru ekki í fylgd fullorðinna.

Kannske er þetta tómur misskilningur hjá mér, svona skýli hlýtur að vera draumur allra refaskyttna sem húka á greni dögum sama við illan kost. Ég setti allavega aðvörun við gatið til öryggis svo engin yrði skotinn :-)

Biðskýli, afdrep refaskyttna eða kannske fyrir fuglaskoðun.
Hönnun ala Kópavogur.

.
.

Náttúrufræðistofnun - nýtt hús og gersemar

Hús Náttúrufræðistofnunar í Urriðaholti • Hönnun: Arkís

Náttúrufræðistofnun sýndi landsmönnum nýja húsið sitt í Urriðaholti á laugardaginn (5/3/2011). Þangað komu næstum 4000 manns þrátt fyrir grenjandi rigningu og slagveður sem gerði menn næstum gegndrepa á leið milli bíls og húss. Óveðrið hafði þó þann kost að tækifæri gafst til að meta áhrif glerhjúpsins sem er utan á byggingunni og ekki var annað að sjá en að hann virkaði vel a.m.k. stóðu flestir gluggar opnir og létu sér lítið finnast um slagveðrið fyrir utan. Ég ímynda mér að á sólskinsdegi varpi  mynstrið á glerinu margbreytilegum skuggum inn í húsið. Gaman væri að koma aftur við slíkar aðstæður.

Að innan er umhverfið látlaust og bjart, litir eru ljósir og óvæntur litur við stigana virkar fínt. Húsið er skorið í sundur af tveimur gjám þannig að úr verða þrjár einingar og stigahúsin mynda brú á milli þeirra.  Þetta gengur vel upp og það er skemmtilegt að ganga bygginguna á enda og upplifa húsin þrjú sem eru hvert með sínu lagi. Þetta verður góður vinnustaður. 

Mikið var gleðilegt að sjá húsgögnin sem Náttúrufræðistofnun hefur flutt með sér í húsið. Þar eru margar gersemar og skilst mér að meira sé að finna í geymslum þrátt fyrir að töluvert hafi farið á Hönnunarsafnið.  Starfsmenn vissu heilmikið um húsgögnin og um þau spunnust skemmtilegar umræður m.a. vangaveltur um hvort þessi húsgögn hefðu varðveist ef stofnunin hefði haft efni á að kaupa nýtt á undanförnum árum. Það þarf reyndar að íhuga vel hvernig svona hlutum er stillt upp til að þeir njóti sín en mér sýnist þau vera að vinna í því t.d. eru nokkrar skrifstofur að taka á sig nútímalega 60's mynd. Náttúrufræðistofnun á lof skilið fyrir að varðveita húsgögnin og bjóða Hönnunarsafninu þau sem ekki eru notuð. Til hamingju með nýju heimkynnin.
Ég læt nokkrar myndir, sem ég tók í gegn um glugga því skrifstofurnar voru læstar, fylgja með ásamt vangaveltum um uppruna þess sem þær sýna.

Mynd 1. Innanstokksmunir og gersemar.

Efst: Skrifborð (1950-1960) framleiðandi: Gamla Kompanýið eða Kristján Siggeirsson. Ofan á borðinu eru kassar með flugum sem vildu endilega vera með á myndinni.

Miðja: 1. Hurð og gluggi að skrifstofum. 2. Tekk skrifborð og stóll (mynd 4). 3. Gamlar skúffur, liturinn bendir til að þær séu eftir Guðmund Kr. Kristinsson. 4. E60 stóll (framleiddur frá 1960 og ennþá vinsælasti stóll fyrirtækisins) frá Sóló Húsgögn. 

Neðst: 1. Stóll (mynd 2). 2. Innrétting (1963-1965), tekk, málaðar hliðar og stálprófill, hönnun: Guðmundur Kr. Kristinsson.  3. Stóll  (mynd 4).

Mynd 2. Skrifstofa (sama rými og á mynd 3).

Þetta er fínn stóll, flatstál, hvítar plastreimar, seta og bak með Salon áklæði frá Ullarverksmiðjunni Álafoss. Ég hafði samband við Hönnunarsafn Íslands til að grennslast fyrir um hönnuðinn. Harpa Þórsdóttir svaraði mér og segir stólinn án efa vera eftir bræðurna Jón (1916-2003) og Guðmund Benediktssyni (1920-2000), þeir hafi oft notað stál og plastreimar eins og í þessum stól, safnið á einnig útistóla eftir þá.

Mynd 3. Skrifstofa (sama rými og á mynd 2).

Staflanlegur stóll (1955+): 14 mm rör, tekk bak, seta með Salon áklæði frá Ullarverksmiðjunni Álafoss, hönnuður Jón Benediktsson (1916-2003), sennilega framleiddur hjá Stálhúsgögn. Skrifborð: tekk og stálprófill, málaðar hliðar á skúffum, Guðmundur Kr. Kristinsson. Skáparnir eru, eins og önnur nýrri húsgögn, Seria skrifstofuhúsgögn frá Á. Guðmundsson.

Mynd 4. Vinnurými / skrifstofa.

Stólar (1950-1960) sennilega frá sama stað og skrifborðið á mynd 1. Skrifborð: Undirstaða úr stálprófil, sýnilegur viður tekk, borðplata fest með messing hettuskrúfum, upphaflega framleitt hjá Helga Einarssyni en síðar hjá Á. Guðmundsson. Hliðarborð: Tekk og 15 mm stálteinn, Guðmundur Kr. Kristinsson. (1925-2001). Til hægri glittir í samskonar innréttingu og á mynd 1, eftir Guðmund.

Mynd 3. Skrifstofa.

Um stólinn veit ég lítið annað það að hann er ákaflega fallegur, stílinn mætti kenna við danska hönnuði. Ólíklegt er að hann sé smíðaður hér á landi. Borðið er samstætt við skrifborðið á mynd 1.

Mynd 4. Skrifstofa.

Þessi stóll er ekki mjög gamall en hann sómir sér vel með Seria skrifborðinu þó hann sé ekki alveg samkvæmt nýjustu tísku. 

Mynd 5. Skrifstofa.

Stóll (um 1970) úr krossviði, hönnuður Þorkell Guðmundsson, framleiðandi Á. Guðmundsson. Seria 2 skrifborð frá sama framleiðanda.

Strandbústaður Le Cobusier

 Le Corbusier teiknaði eitt hús fyris sjálfan sig -16 fermetra bústaðinn Le Cabanon á Frönsku Rivierunni
Hann teiknaði einnig Unité d'Habitation í Marseilles (1952) - 17 hæðir fyrir 1600 íbúa. Svolítið önnur stærðarhlutföll!

Bústaður meistarans 4 x 4 metrar

Það er merkilegt til þess að hugsa að eina byggingin sem Le Corbusier (1887-1965),afi modernismans,  hannaði algjörlega fyrir sjálfan sig hafi verið 16 fermetra strandbústaðurinn Le Cabanon. Og það er ekki einu sinni alveg rétt því bústaðurinn var gjöf til konu hans. Corbusier teiknaði hann á 45 mínútum á nýársdag 1951, hann var svo byggður 1952. Þar dvaldi hann á sumrin í 10 ár og eyddi þar sinni síðustu nóttu 27. ágúst 1965, síðar þann dag drukknaði hann í sjónum nálægt bústaðum. Bústaðurinn er einstakt dæmi um mikro-arkitektúr sem er einfaldur og vandaður, þjónar fullkomlega hlutverki sínu og er laus við allan óþarfa. Sumir segja að efnisvalið gangi þvert á önnur verk meistarans, sem hreifst af sjónsteypu og talaði um hús sem "maskínur til að búa í". Bústaðurinn er úr timbri, klæddur krossviði að innan. Innanstokksmunir, sem þjóna flestir meira en einu hlutverki, eru úr furu og hreinlætistæki eru sömu gerðar og í járnbrautarvögnum. Á nokkrum stöðum eru málverk eftir Corb td. á á gluggahlerum og í forstofu.

Myndirnar eru af módeli í fullri stærð,sem var á sýningu Breska arkitektafélagsins 2009. Mér þótti þær snyrtilegri, sem er auðvitað bara pjatt. Góðar myndir af bústaðnum eru hér og hér má lesa ýmislegt um Corbusier.

Bústaður eins áhrifamesta arkitekts 20. aldarinnar, einfalt, einlægt og virkar.

"Bölgen" báruhús í Vejle

Bölgen í Vejle mun verða eitt af kennileitum bæjarins. 

Smellið hér
til að sjá allar myndirnar

Við ströndina í Vejle á Suður-Jótlandi standa þessi hús sem heita "Bölgen", þar er væntanlega vísað í bárur hafsins. Íbúðirnar eru opnar í gegn um húsið,  elhús í miðju og stofur, með stórum svölum sitt hvorumegin, þannig að alltaf er birta og útsýni til austurs og vesturs. Sjávarmegin hússins verður smábátahöfn og strandstígur mun liggja út eftir firðinum. Að sögn arkitektana er form hússins innblásið af firðinum, hæðunum, brúnni og Vejle bæ. Þök klædd hvítum flísum og gaflar úr gleri munu á daginn speglast í sjónum en á kvöldin uppljómast og rísa upp sem marglit fjöll.  

Húsin eru hönnuð af "íslandsvinunum" á arkitektastofu Henning Larsen sem hafa m.a. hannað Hörpu og Háskólann í Reykjavík.

Frönsk hönnun í Japan

Efst er stóll og borð • Einstaklega fallegir litir. 

Þessa hressilegu plasthluti og innréttingar hannaði franski arkitektinn Emmanuelle Moureaux sem starfar í Japan. Verk hennar einkennast af litagleði sem hún beitir skipulega með því að stilla húsgögnum og lausum hlutum á móti ljósum bakgrunni og nota tjöld eða litað plast til að skapa rými. Þannig verða litirnir færanlegir og rýmið breytilegt. Tjöldin sem sjást á myndunum hefur hún hannað í nokkrum gerðum og segist nota þau í stað japönsku Shoji skilveggjanna. Hún notar einnig litaðar plastplötur sem skilrúm  á athyglisverðan hátt. Vefsíðan hennar er vel upp sett og vel þess verð að skoða. 

Umhvefið er yfirleitt í ljósum lit, skæru litirnir eru á húsgögnum. • Stærri myndir hér.

Kofar á þökum Hong Kong

• Kofar af öllum gerðum á þökum háhýsa Hong Kong •

•  Rufina Wa og Stefan Canham •

Á þökum háhýsa í Hong Kong eru þorp úr óleyfilegum kofum, sem eru allt frá því að vera óhæfir mannabústaðir til margra hæða kofa með helstu nauðsynjum, nettengingu og gervihnattadiskum. Arkitektinn Rufina Wu og ljósmyndarinn Stefan Canham  hafa gefið út bók sem inniheldur myndir og teikningar af byggð á þaki fimm stærstu húsana og myndir af heimilum tuttugu fjölskyldna . Þau hafa einnig haldið sýningar og fyrirlestra víða um heim og árið 2008 fengu Bauhaus verðlaunin fyrir  bókina. >>>>Hér eru stærri myndir.

Via: The Top-Up City