Studio Job - Dulræn húsgögn

Hætt er við að þessi klukka gefi tilefni til að skoða tímann í víðara samhengi en sjö mínútur yfir tíu. Inni í henni er svo leynihólf sem geymir minjagrip sérhannaðan af Studio Job

Lífið er ein allsherjar gáta sem við leitum stöðugt svara við. Ekki bætir úr skák að stundum er gátan sett fram í táknmáli af ýmsum toga. Hér eu t.d. húsgögn sem þakin eru dularfullu táknmáli sem málað er á kistil, klukku og skáp. Hvort þetta táknmál inniheldur eitthvað svar við lífsgátunni skal ósagt látið en eitthvað er væntanlega hægt að lesa úr því - hvað sem það nú er. Túlki hver fyrir sig.

Húsgögnin dularfullu, sem nefnast “Altdeutsche Möbel”, eru hönnuð af tvíeykinu Job Smeets and Nynke Tynagel sjá Studio Job í Hollandi fyrir moooi sem getið hefur sér gott orð fyrir frumleg húsgögn. Aðalhönnuður moooi hefur lengst af verið annar af stofnendum verslunarinnar,  Marcel Wanders,  en nú hafa fleiri hönnuðir bæst í hópinn. 

Hönnunin er innblásin af fornum Þýskum húsgögnum sem skörtuðu táknum af ýmsum toga, sem sögðu sögur og gáfu tilefni til allskonar vangaveltna. Þau voru oftast smíðuð úr eik og skreytingin mótuð í viðinn. Húsgögn Studio Job eru, hinsvegar, smíðuð úr furu sem táknmálið er handmálað á. 

“Altdeutsche Möbel". Kistill, klukka og skápur.

Tákn og tilvísanir af ýmsu tagi - kross, lyklar, flugur og teningar sem samtals telja 26 eða 7667 eða…eða…

Tannhjól, bananar, fjögra blaða smári, örryggisnælur og matur - gott veganesti - en hvað skyldu hauskúpurnar tákna?

Via: homedit.com & moooi.com/
Tengill artsy.net á verk Marcel Wanders

dOCUMENTA (13) - Hugenottenhaus

Hugenottenhaus (Hugenot House)

Fyrir dOCUMENTA (13) í Kassel hefur Theaster Gates endurgert Hugenottenhaus, gamalt hús sem staðið hefur autt frá 1970, með húsgögnum sem smíðuð eru úr innviðum húss í Chicago, sem álíka er komið fyrir. Síðan verða smíðaðir gripir úr innviðum Hugenottenhaus og settir upp í húsinu í Chicago.

Verkið er í anda þess sem undanfarið hefur rutt sér rúms í Evrópu og á upphaf að rekja til Hollands. Þar hafa húsgögn og innviðir úr endurnýttum hlutum verið áberandi undanfarin ár. Efni úr gömlum húsum, sérstaklega með leyfum af málningu og ummerkjum um fyrri notkun,  hefur fundið sér leið í innanstokksmuni af ýmsu tagi og nú framleiðir tískuiðnaðurinn veggfóður með myndum af flagnandi klæðningum og "slitin" húsgögn af ýmsu tagi. Kannske má líkja þessu við framleiðslu á nýjum "slitnum" hljóðfærum og rifnum gallabuxum. 

En í Hugenottenhaus var þetta allt ekta og stemmingin einstök. Það mátti auðveldlega skynja einlægni fólksins sem dvaldi í húsinu á meðan á smíðinni stóð og allskonar uppákomur voru í gangi. Í förum með Gates var hljómsveit hans, sem við misstum því miður af.

Fleiri myndir úr Hugenottenhaus er að finna hér á Facebook síðunni.

Hér segir Theaster Gates frá Hugenottenhaus verkefninu - 15:25 mínútur. 

Hér segir hann frá Dorchester verkefnum sem sýna vel hvað hann fæst við - 03:00 mínutur sem er vel varið í að skoða þetta myndband.

Fleiri myndir úr Hugenottenhaus er að finna hér á Facebook síðunni.

dOCUMENTA (13) í Kassel

Fimmæringurinn í Kassel er einn af mikilvægustu listviðburðum heims. Þar sýna hundruð listamanna verk sín, sem oftar en ekki vekja athygli á umhverfis- og stjórnmálum, viðburðum,  vonum og væntingum í nútíma og sögulegu samhengi. 

Í 100 daga iðar bærinn lífi sýningargesta og listamanna. Hvarvetna er eitthvað á seiði og íbúafjöldi Kassel margfaldast. Árið 2007 voru sýningargestir fjórum sinnum fleiri en hinir 130.000 íbúar Kassel og í ár er búist við enn fleirum. 

Við dvöldum þarna í þrjá sólríka daga - þeir liðu eins og augnablik - við hefðum getað verið mikið lengur og séð eitthvað nýtt á hverjum degi. 

Svona viðburði er erfitt að lýsa, maður þarf að ganga inn í hann og vera þáttakandi í ævintýrinu. Það má benda á þessa 3d myndasýningu, sem er sennileg það besta sem býðst til að skoða viðburðinn á netinu, hér má finna sýningarskrá og svo eru fáeinar myndir á Facebook síðunni okkar.

Lífræn list

Port Salut upp á sitt besta

Einu sinni deildi ég vinnustofu með vinkonu minni sem gerir allt að list - sama hvað er. Eitt af áhugamálum hennar á þessum tíma var að fylgjast með allskonar lífrænum hlutum þroskast . Tilraunirnar voru gerðar í sameiginlegri kaffistofu 10 eða 12 listamanna sem sýndu þessu mikið umburðarlyndi. Lífræn list er nefnilega síbreytileg, höfðar til allra skynfæra okkar og krefst mikillar þolinmæði - ekki síst þolinmæði áhorfandans Tökum dæmi:  Þroskaferli Port Salut osts sem stendur út í glugga í marga daga - bragð, lykt, ásýnd og þroskaskeið  - mikið sjónarspil en á köflum næstum því óbærilegt, sérstaklega lyktin! Egg, ávextir, melóna sem sprakk í loft upp í orðsins fyllstu merkingu, það var allt prófað. 

Mér varð hugsað til þessa tíma þegar ég sá þessa banana með myndverkum sem þroskast með þeim og hverfa að lokum.  Aðferðinni svipar til koparstungu og það er einmitt eitt af því sem vinkona mín fæst við. Höfundur bananaverksins, Phil Hansen,  líkir aðferðinni, hinsvegar, við húðflúr - hýðisflúr? - sem á vel við í þessu tilfelli. Hann fæst einnig við fleira sem skoða má og sækja á vefsíðuna philinthewhaaat.com 

Tattóveraðir bananar

Via: designboom.com

Fiðrildasinfónía

Paul Villinski hirðir dósir á götum New York-borgar og gerir úr þeim fugla og fiðrildi. Hann segir að eftir umbreytinguna úr dós í fiðrildi flögri þau um vinnustofuna og taki sér svo bólfestu þar sem þeim hentar. Oftar en ekki vill svo til að úr þessu verður einhverskonar myndform. Stundum setjast þau að í einhverju sem hann er að bjástra við og verða þar með hluti þess. 

Hér hafa fiðrildin gert sér leið inn í óvenjulegt ljóst selló og gítar. Villinski gefur ekki upp hvaðan hljóðfærin koma en gítargeggjarar ættu að þekkja Epiphone Dot gítarinn, menn hafa fengið fiðring yfir öðru eins.

Via My Modern Met

Stólafjör - Börnin í Valhúsaskóla hressa upp á umhverfið

Börnin í 7. bekk Valhúsaskóla unnu skemmtilegt og fræðandi verkefni í fyrra. Eftir margra ára notkun voru stólarnir í mötuneytinu orðnir snjáðir, illa farnir og langt frá því að vera augnayndi. Upp kom sú hugmynd að nemendurnir gætu sjálfir lappað upp á þá.  Móa og Ásta, kennarar í myndmennt og textíl, fræddu börnin um  endurnýtingu, sýndu þeim listaverk, nytjahluti og annað sem tengja mátti verkefninu. Í hópvinnu skiptust börnin á hugmyndum, ákváðu þema og hófu framkvæmdir. Efniviður kom úr safnveitu skólans en í hana fara endurnýtanlegir hlutir sem til falla - taubútar, plastdósir, pappír, bönd o.fl. frá allri starfsemi skólans m.a. skrifstofu og mötuneyti. Árangurinn er glæsilegur - 15 flottir stólar, hver með sitt nafn,  sem geta hresst upp á mötuneytið svo um munar. 
Mikilvægast er þó að hér tóku börnin þátt í að móta umhverfi sitt, fræðast um ýmislegt sem máli skiptir við mótun þess og þau gripu til aðgerða - og tókst frábærlega til. Enginn er of ungur eða gamall til að taka virkan þátt í að móta umhverfi sitt. Til marks um það má benda á smíðavelli barnanna sem hressa upp á umhverfi okkar á sumrin - stórkostleg og óheft byggingarlist -  öllum til gleði, ungum sem öldnum.

Á menningarhátíð Seltjarnarness 2011 var sett upp sýning á stólunum -"Stólafjör" - í Bókasafni Seltjarnarness og vöktu þeir mikla lukku. 

Kærar þakkir til Ástu og Móu fyrir myndirnar. Hönnun & hlutir ber ábyrgð á skuggunum skrítnu sem fylgja stólunum;-)

Sýningin "i Vesterveg" í Húsavík 2011

i Vesterveg  gömlu sldarverksmiðjunni Húsavík

Það var fallegt í Húsavík á norrænu strandmenningarhátíðinni „Sail Husavik 2011“.  Víð höfnina svifu litrík fley seglum þöndum og á kajanum voru sýningar, markaðir og dans. Og það var meira í vændum. Forsætisráðherra opnaði Garðarshólm, fræða- og menningarsetur sem mun rísa í gömlu síldarverksmiðjunni á hafnarbakka Húsavíkur. Þema Garðarshólma verður samlíf manns og náttúru; hvernig maðurinn mótar náttúruna og náttúran manninn.  

Þarna var einnig sýningin "i Vesterveg". Sýningin er afrakstur samstarfs listamanna frá Íslandi, Færeyjum, Hjaltlandseyjum og Noregi. Íslenska myndlistakonan Málfríður Aðalsteinsdóttir er stjórnandi og upphafsmaður að verkefninu. Aðrir listamenn sem standa að sýningunni eru Elsie-Ann Hochlin og Johannes Vemren Rygh frá Noregi, Guðjón Ketilsson og Kristín Reynisdóttir frá Íslandi, Jogvan Sverrason Biskopstø frá Færeyjum og Barbara Ridland og Roxane Permar frá Hjaltlandseyjum.   

Sýningin hefur þegar verið sett upp í Noregi, Færeyjum, Danmörku, á Hjaltlandseyjum,  í Norræna Húsinu á Íslandi og nú í gömlu síldarverksmiðjunni í Húsavík. Gróft umhverfi verksmiðjunnar hentar listaverkunum einkar vel og lýsingin meistaraverk - ótrúlega flott. 
Myndirnar gefa hugmynd um stemminguna sem ríkti í síldarverksmiðjunni á Húsavík þessa daga.

Hér er hægt að skoða myndirnar í stærri glugga og betri upplausn og lesa meira um sýninguna. 
Þetta er líka betri leið til ef Safari vafri er notaður.

Listaháskólinn - Útskriftarsýning 2011 - Vöruhönnun

fr

Verk vöruhönnuða á útskriftarsýningu Listaháskólans

 Útskriftarsýning nemenda myndlistardeildar og hönnunar- og arkitektúrdeildar Listaháskólans opnaði í dag (23.4.2011) í Hafnarhúsi. Í ár eru 72 útskriftarnemendur sem sýna þar verk sín, 53 í hönnunar- og arkitekúrdeild og 19 í myndlistardeild. Það var mikið fjör og gleði í loftinu enda blasir nú framtíðin við með nýjum tækifærum. Í dag var margt fólk að skoða sýninguna, enda er þetta dagurinn sem vinir, ættingjar, afar og ömmur mæta til að fagna með listamanninum nýútskrifaða.

Og ég mætti líka með myndavélina til að skrá stemminguna en vélin neitaði að taka myndir, enda var rafhlaðan í hleðslutækinu heima. Svei mér þá, maður ætti að þegja yfir svona afglöpum. Ég mynda á morgun enda þarf töluverðan tíma til að skoða allt, byggingarlistin er t.d. tímafrek. Hér eru nú samt myndir - hönnunardeildin var auðvitað með "Press kit" á disk með myndum og upplýsingum um vöruhönnuðina átta sem útskrifast í ár og úthlutaði mér einum. Flott framtak hjá þeim.

Myndir og upplýsingar hér að neðan eru fengnar af diskinum. Hér eru myndir af verkunum sem þau sýna í Hafnarhúsinu ásamt textanum sem þau hafa skrifað um verkin. Í nokkrum tilfellum eru einnig myndir ef eldri verkum. Og svo það sem mestu skiptir: hvar hægt er að ná til þeirra.

Vinsamlega hafið samband ef eitthvað má betur fara, hér er póstfangið

Almar Alfreðsson - almar.is

Hugföng  - Almar Alfreðsson

Hugföng eru geometrísk form sem gerð eru til að örva ímyndunarafl barna á skemmtilegan hátt. Útlit þeirra er byggt á mismunandi samsetningum þrí- og fimmhyrninga sem fylgja reglum um gullinsnið. Hugmyndin er fólgin í því að leggja saman nokkur form, þá opnast möguleikar á tugi mismunandi útkomna þar sem ímyndunaraflið ræður ferðinni. Inni í hverju formi eru seglar sem gera þessar samsetningar mögulegar á einfaldan en jafnframt spennandi hátt. Hugföng koma í þremur mismunandi útgáfum og inniheldur hver þeirra sjö ólík form. Innblástur verksins kemur úr æsku hönnuðar sem einkenndist meðal annars af miklum áhuga á Star Wars og ofurhetjum.

Friðrik Steinn Friðriksson - fridriksteinn.is

Mark/mið  • Mark/mið (hluti)
Á Brú • Koya - Friðrik Steinn Friðriksson

Markið er fornmunur, hefur ekki breyst í meira en hundrað ár. Hvaða áhrif hefur nýtt form? Verður knattspyrna að öðrum leik ef umgjörð hennar breytist? Breytingin sjálf er í ættboga knattarins, formfræði hans. Form marksins er fengið úr hyrningum boltans og samspil þess við hann því meira.

Helga Ragnheiður Jósepsdóttir - www.helgajoseps.com

Hi! Jewlery (2009)  • Kjötkrókur (2009) • HispaNordicTable (2008)
Bubblumublur - Helga Ragnheiður Jósepsdóttir

Bubblumublur draga jarðhitann upp á yfirborðið og mynda þannig mannvænt hverasvæði; samkomustað sem yljar bæði sálinni og skrokknum.

Inga Dóra Jóhannsdóttir • www.spoi.is

Bátt Blóð matarsett - 47-8 mjólkurkanna - Inga Dóra Jóhannsdóttir

Tignarfók fyrr á öldum óttaðist smitsjúdóma og greip til ýmissa ráða til að koma í veg fyrir þá. Matur var geymdur, borinn fram og snæddur af silfri, því silfur hefur þann eiginleika að eyða bakteríum. Þessi ofnotkun á silfri olli því að silfuragnir sátu eftir í líkama fólks og lituðu hörund þess blátt. Blátt Blóð er matarsett úr postulíni, skreytt snertiflötum úr silfri.

Sigríður Þóra Árdal • www.sigridurardal.com

Flow & company vörur - Sigríður Þóra Árdal

Í heimi flæðandi forma er allt mögulegt. Litríkar verur af óræðum uppruna opna sýn inn í ævintýraheim. Flow and company er vörulína unnin úr þessum myndheimi sem settur hefur verið fram í vefnaði og veggfóðri.

Tinna Jóhannsdóttir - tinnatinna@gmail.com

Jafnvægi / Bollar (2009) - Hvörf ljós -Tinna Jóhannsdóttir

Hvörf er ljós sem sýnir gang sólar á heilu ári; frá sólstöðum á sumri til sólhvarfa á vetri. Ljósmagnið minnkar og eykst í öfugu hlutfalli við sólargang; er mest þegar dagur er stystur og minnst þegar náttúrulegrar birtu nýtur daglangt.

Silja Ósk Þórðardóttir - www.siljaosk.is

Lovísa, Munda og Veiga hirslur - Silja Ósk Þórðardóttir

Við tengjumst hlutum sem okkur er annt um; persónugerum þá. Lovísa, Munda og Veiga eru í senn hirslur fyrir þessa hluti og sjálfstæðar persónur sem hver og einn túlkar á sinn hátt – strengjabrúður sem tengjast eiganda sínum órjúfanlegum böndum í gegnum sögurnar sem þær varðveita fyrir hann.

Unnur Valdís Kristjánsdóttir - www.leynivopnid.is

Ljós fyrir Gunnhildi - Unnur Valdís Kristjánsdóttir

Ljós fyrir Gunnhildi er verkefni innblásið af sögu Gunnhildar Eyþórsdóttur sem fluttist ung kona til Kairó árið 1945 og þurfti að takast á við lífið í framandi menningarsam félagi. 

.
.

Gítarsmiðir og Picasso í New York

"Guitar Heroes" gítar- og hljóðfærasýning í Mertopolitan safninu

Gítar (ca. 1630 -50) - Matteo Sellas ( Þýskur ca. 1599-1654)
Greni, pergament, "snakewood", fílabein.

Á Mertopolitan safninu í New York stendur yfir sýningin "Guitar Heroes" á gíturum  ítalsk/bandarískara hljóðfærasmiða. Þetta eru gítarsmiðirnir John D’Angelico (1905–1964), James D’Aquisto (1935–1995) og John Monteleone (f. 1947). Allir eiga þeir það sameiginlegt að vera bandaríkjamenn af norður-ítölskum uppruna en þar var lengst af vagga evrópskrar hljóðfærasmíði. Til að setja sýninguna í sögulegt samhengi eru einnig sýnd nokkur ítölsk hljóðfæri, það elsta er fiðla frá 1559 eftir Andrea Amati. Hér eru sýndir nokkrir gamlir gítarar, lútur og svo "archtop" gítarar eftir smiðina þrjá.

Svo skemmtilega vill til að í MoMA er sýning á verkum Pablo Picasso sem tengjast gítörum og því upplagt að hafa nokkur með. Frábær vefsíða er tileinkuð þeirri sýningu, kíkið á hana.

Gítar (1700) - Antonio Stradivari (Ítalskur 1644-1737)
Greni, hlynur, íbenholt.

Gítar (ca 1700) - Smiður óþekktur
Greni, íbenholt, fílabein, skjaldbökuskel.

Mandolín (ca. 1900) - Angelo Mannello (Ítalskur/Bandarískur 1858-1922)
Greni, skjaldbökuskel, fílabein, málmur.

 Fyrsti Gibson L5 gítarinn  - Gítar (1932)  John D'Angelico (1905-1964)
Gítar (1972)  James D'Aquisto (1935-1995) - Gítar (2008)  John Monteleone (f. 1947)

"Archtop" gítar hefur íhvolfan botn og topp með "f" götum eins og á fiðlu. Þessi gítar er líka yngstur kassagítara uppfundinn af Orwille Gibson (1856-1918) um 1890. Gibson gerði einnig mandolín með svipuðu lagi og fékk einkaleyfi á hönnuninni árið 1895. Brátt var eftirspurn svo milkl að Gibson annaði ekki eftirspurn, hann seldi þvi einkaleyfið til fjárfesta sem stofnuðu hina frægu Gibson gítarsmiðju. Þar tók Lloyd Loar við og fyrsti L-5 gítarinn varð til árið 1922.  

_______________________________________________________________________

"Picasso Guitars 1912-1914" sýning í MoMA

Pablo Picasso (1881-1973)
Still life with Guitar (1913) - Violin ((ca. 1912)

Pablo Picasso (1881-1973)
Guitar and Sheet Music (1912) - Guitar, Sheet Musuc and Glass (ca. 1912)
Bar Table with Guitar (1913) - Still Life with Guitar (1922)
.
.

Sjónblekking

Skrunið upp og niður og þá birtist .....

Via: reblololo    Finn því miður ekkert um höfundinn, bæti því við ef eitthvað finnst.